अहमदाबाद । बिपरजोयले चक्रवातले भारतको पश्चिमी तटीय क्षेत्रमा भारी वर्षा र हावाहुरी ल्याउने सम्भावना रहेको छ । भारतीय तटीय क्षेत्रमा आँधी आउन अझै दुई दिन बाँकी रहे पनि केरला, गुजरात, मुम्बईमा शक्तिशाली छालहरू आउन थालिसकेका छन् ।

जुन १५ मा यो आँधी भारतमा पुगेपछि गुजरातको कच्छ, देवभूमि द्वारका, पोरबन्दर, जामनगर, मोरबी, जुनागढ र राजकोट जिल्लामा ठुलो क्षति हुने सम्भावना छ । भारतीय मौसम विभाग र भारतीय राष्ट्रिय महासागर सूचना सेवा केन्द्रले जुन १२ मा सम्भावित क्षतिको जानकारी दिँदै संयुक्त बुलेटिन जारी गरेको थियो।

कच्ची घरहरूमा व्यापक क्षति हुन सक्ने अनुमान गरिएको छ । बिजुली तथा सञ्चारका पोलहरू ढाल्ने वा उखेलेर सडकमा क्षति पुग्ने सम्भावना पनि रहेको छ । रेलवे, ओभरहेड पावर लाइनहरू र सिग्नल प्रणालीहरू अवरुद्ध हुने र बाली र रूखहरूमा व्यापक क्षति हुने अनुमान गरिएको छ। गुजरात, महाराष्ट्र, गोवा, कर्नाटक, केरला र लक्षद्वीपमा हाई वेभ अलर्ट जारी गरिएको छ।

आँधीको गम्भीरता देखेर भारतीय प्रधानमन्त्री नरेन्द्र मोदीले सोमबार तयारीको समीक्षा गरेका थिए । बैठकमा केन्द्रीय गृहमन्त्री अमित शाह, प्रधानमन्त्रीका प्रमुख सचिव पीके मिश्र, क्याबिनेट सचिव राजीव गौबा, पृथ्वी विज्ञान सचिव एम रविचन्द्रन, राष्ट्रिय आपदा व्यवस्थापन प्राधिकरणका सदस्य कमल किशोर र भारतीय मौसम विभागका महानिर्देशक मृत्युञ्जय महापात्रा सहभागी थिए।

समाचार एजेन्सी पीटीआईका अनुसार अधिकारीहरूले बैठकमा कच्छ, देवभूमि द्वारका, पोरबंदर, जामनगर, राजकोट, जुनागढ र मोरबी चक्रवातबाट प्रभावित हुने सम्भावना रहेको बताएका थिए । आँधीको गति जुन १५ गते बिहानदेखि १२५ देखि १ सय ३५ किलोमिटर प्रतिघण्टा हुने र  यो प्रतिघण्टा १४५ किलोमिटरको गतिसम्म पुग्न सक्ने प्रक्षेपण गरिएको छ ।
बीबीसी हिन्दी–