एकै दिन काठमाडौँमा दुई ठाउँमा चोरी
माघ, १८ काठमाडौँ । काठमाडौँमा हिजो एकै दिन दुईवटा घरबाट गहना र नगद चोरी भएको छ । नेपाल प्रहरीका अनुसार काठमाडौँ महानगरपालिका-१६ बनस्थली नर्सरी चोक डेरा गरी बस्ने नुवाकोट किस्पाङ्ग गाउँपालिका-४ घर भएका ४० वर्षीय रामहरी सिमखडाको कोठा चोरी भएको छ ।
कोठाबाट कोही नभएको अवस्थामा ढोकाको ताला फोडेर सुनका विभिन्न गहना र नगद ४६ हजार ४ सय रुपैयाँ गरी करिब ४ लाख ४ सय रुपैयाँ बराबरको धनमाल बुधबार दिउँसो चोरी भएको प्रहरीले बताएको छ ।
यसैगरी काठमाडौँ महानगरपालिका-१४ कलंकी डेरा गरी बस्ने सोही महानरपालिका-२१ मरु गणेश घर भएका ३० वर्षीय सुजन जोशीको कोठाबाट ताल्चा फोडेर सुनका विभिन्न गहना र नगद ३२ हजार रुपैयाँ गरी करिब ३ लाख ४० हजार रुपैयाँ बराबरको धनमाल हिजो साँझ चोरी भएको छ ।
