हेलिकप्टरमा चिवाभञ्ज्याङ पुगे ओली
पुष,१ काठमाडौं । मध्यपहाडी लोकमार्गकेन्द्रित संकल्प यात्राको अन्तिम दिन नेकपा (एमाले) का अध्यक्ष केपी शर्मा ओली हेलिकप्टर चढेर चिवाभञ्याङ पुगेका छन्। यात्राको १८ औं दिन पाँचथर सदरमुकाम फिदिमदेखि च्याङथापु हुँदै अध्यक्ष ओलीसहितको टोली चिवाभञ्ज्याङ पुग्ने कार्यक्रम थियो।
तर बीचको बाटो कच्ची र फोर ह्विल गाडी मात्रै जाने भएकाले हेलिकप्टर प्रयोग गर्नु परेको अध्यक्ष ओलीका प्रेस सल्लाहकार रामशरण बजगाईंले बताए । ‘केही ठाउँको बाटो कच्ची भएकाले अध्यक्षज्यू हेलिकप्टर चढ्नुभएको हो, गाडी आउन सक्दैनथ्यो,’ उनले भने।
यात्राको अन्तिम दिन झन्डै १०१ किलोमिटर दुरीमा यात्रा गर्ने तयारी थियो। गाडीबाट छिचोल्न नसकेपछि ओली, वरिष्ठ उपाध्यक्ष ईश्वर पोखरेल, उपाध्यक्षहरू, महासचिवसहितका नेताले हेलिकप्टर प्रयोग गरेका हुन्।
