भदौ,२३ काठमाडौं । पोखराको महेन्द्रपुलस्थित पोखरा आर्ट ग्यालरी र पुस्तकालयमा महानगरपालिकाले डोजर चलाएको छ।
२०५६ सालमा स्थापना भएको पोखराको एक मात्र सार्वजनिक ग्यालरी पुरानो र जीर्ण भएको भन्दै महानगरले भत्काएको हो।

तत्कालीन मेयर मानबहादुर जिसीकै कार्यकालमा त्यसलाई भत्काउने निर्णय भइसकेको महानगरपालिकाले जनाएको छ।
हालका मेयर धनराज आचार्यसहितको टोलीले आजबिहान महेन्द्रपुल पुगेर उक्त संरचना भत्काएको छ ।

पोखरा महानगरको गत चैत १ गते बसेको २८ औं नगर कार्यपालिका बैठकले महेन्द्रपुलबाट पोखरा आर्ट ग्यालरी र सार्वजनिक पुस्तकालय न्युरोडस्थित प्रदेश संग्रहालयमा सार्ने निर्णय गरेको थियो।

फोटो र चित्र नै प्रदर्शन गर्ने उद्देश्यले बनाइएको भवन पोखरा आर्ट ग्यालरीबाहेक अन्यत्र छैनन् । त्यसैले पोखरामा हुने साना र ठूला प्रदर्शनी त्यहीं हुन्थे ।

ग्यालरीको तल्लो तलामा सटर राखेर भाडामा दिइएको छ। तर, सटर बिचौलियाको हातमा पर्दा महानगरले करोडौं राजस्व उठाउन बाँकी रहेको महानगरको भनाई छ।