पर्वतमा चितुवा मृत अवस्थामा फेला
भदौ,१५ काठमाडौं । पर्वतको मोदी गाउँपालिका– ७ राम्जादेउरालीमा चितुवा मृत अवस्थामा फेला परेको छ । राम्जादेउरालीस्थित गौतम कुल मन्दिरनजिकै धानखेतमा आज चितुवा मृत फेला परेको हो।
स्थानीयवासीले मृत चितुवा देखेलगत्तै डिभिजन वन कार्यालय र प्रहरीलाई खबर गरेका थिए । डिभिजन वन कार्यालयका प्रमुख नवराज बरालले झन्डै तीन वर्षजति उमेरको देखिने चितुवा केही दिनअगाडि नै मरेको हुन सक्ने उनले बताए ।
वन कार्यालयका कर्मचारी, जनप्रतिनिधि र सुरक्षाकर्मीको रोहवरमा चितुवालाई डिभिजन वन कार्यालयपरिसरमा ल्याएर गाडिएको छ । पर्वतमा गत आर्थिक वर्ष ०७९/८० मा नौ चितुवा मृत फेला परेका थिए ।
