ऊर्जामन्त्री पम्फादेवी भुसालले नेपाल सरकारले बंगलादेशलाई विद्युत निर्यातका लागि तयारी गरिरहेको बताएकी छन्।
आज काठमाडौंमा पत्रकारसँग कुरा गर्दै उनले यसै वर्ष बंगलादेशलाई विद्युत निर्यात गरिने बताएकी हुन्।

हाल नेपालले भारतमा बिजुली बिक्री गर्दै आएको छ।
‘हामीले अहिलेसम्म भारतमा मात्रै विद्युत निर्यात गरेका छौं। अब बंगलादेशमा पनि निर्यात हुँदैछ,’ उनले भनिन्, ‘जलविद्युत उत्पादनमा साझेदारी गर्न सहमति भएको र यसै वर्षदेखि ५० मेगावाट विद्युत बंगलादेश जान्छ।’

ऊर्जालाई उत्पादनको माध्यम बनाउन लागिएको र गरिबीको रेखामुनि रहेका जनतालाई निःशुल्कजस्तै रहेको जानकारी दिइन्।
उनले घरायासी प्रयोजनका लागि मूल्य घटाएको र कृषि-सिँचाईमा ७५ प्रतिशत महसुल घटाएको बताइन्।
फरक प्रसङ्गमा उनले गठबन्धनको सिटको विषय आज बेलुकासम्म टुङ्ग्याइने बताइन्।

शुक्रबार टुंगिने भनिएको गठबन्धनको सिट बाँडफाँट प्राविधिक हिसाबले समस्या भएको उल्लेख गर्दै उनले भनिन्, ‘गठबन्धनका नेताहरू बाहिर भएका कारण शुक्रबार हुन सकेन आज साँझ टुंगिन्छ।रासस