सुनसरीको कोसी गाउँपालिका–४ स्थित भित्री सडकखण्डमा आइतबार ट्र्याक्टरले मोटरसाइकललाई ठक्कर दिँदा एक जनाको मृत्यु भएको छ।

मृत्यु हुनेमा मोटरसाइकलमा सवार देवानगञ्ज गाउँपालिक–४ की ५५ वर्षीया जयमुन खातुन रहेको सुनसरीका प्रहरी नायब उपरीक्षक नरेन्द्रकुमार कार्कीले जानकारी दिए।

को २ त २१५८ नम्बरको ट्र्याक्टरले विपरीत दिशाबाट आउँदै गरेको को २८प ९३९९ नम्बरको मोटरसाइकललाई ठक्कर दिँदा मोटरसाइकलमा सवार ५५ वर्षीया खातुनको घटनास्थलमै मृत्यु भएको हो।

मोटरसाइकल चालक मृतककै छोरा २५ वर्षीय जुमरात मियाँ घाइते भएको प्रहरीले जनाएको छ। घाइते जुमरातको उपचार भइरहेको प्रहरीले जनाएको छ।

प्रहरीका अनुसार ठक्कर दिने सवारी साधन र चालक ४६ वर्षीय शुभका मोची जिल्ला प्रहरी कार्यालय सुनसरीको नियन्त्रणमा छन्। घटनाको विषयमा अनुसन्धान भइरहेको प्रहरीले जनाएको छ। रासस