काठमाडौं २७ वैशाख । नेकपा एमालेबाट काठमाडौं महानगरपालिका मेयरका उम्मेदवार केशव स्थापितले आफू निर्वाचित भएपछि एक वर्ष भित्रमा फोहोर मैलाको व्यवस्थापन गर्ने दाबी गरेका छन्।

काठमाडौंमा आयोजित चुनावी सभामा बोल्दै उनले आफू निर्वाचित भएर आए फोहोरमैलाको समस्या समाधान हुने बताएका हुन्। ‘फोहोर मैला व्यवस्थापन एक वर्ष भित्रमा सदाका लागि नियन्त्रण गर्नेछु। केहीदिन भित्र महसुस गर्नुहोला,’ उनले भने, ‘म निर्वाचित भएर आएलगत्तै बिहान, दिउँसो र साँझ गरेर तीनपटक संकलन गरिन्छ।’

उनले फोहोर व्यवस्थापनमा कांग्रेसले राजनीतिक गर्न नपाउने पनि बताए। एक वर्ष भित्रमा धुवाँधुलो लगायतको समस्या पनि समाधान गर्ने स्थापितले दाबी गरे। ‘मलाई काठमाडौंमा मेरो प्रतिपक्ष छ जस्तो नै लागेको छैन,’ उनले भने,‘तर, षड्यन्त्र हुन सक्छ। तपाईंहरु सबैले चिर्नु होला।’