कंगो अपरेसनमा ज्यान गुमाएका सैनिक अनिल गुरूङको शव नेपाल आइपुग्यो
कंगो अपरेसनमा ज्यान गुमाएका सैनिक प्युठ अनिल गुरूङको शव नेपाल ल्याइएको छ।
उनको शव हिजो कंगोबाट फिर्ता ल्याइएको नेपाली सेनाको जनसम्पर्क निर्देशनालयले जनाएको छ।
चैत २२ गते कंगोमा सञ्चालन भएको अपरेसन बालीको क्रममा विद्रोहीको फायरबाट घाइते भएका गुरूङको बुनियाँस्थित अस्पतालको उपचारको क्रममा मृत्यु भएको थियो।
गुरूङको शव नेपाल ल्याएर छाउनीस्थित वीरेन्द्र अस्पतालमा आज बिहान प्रधानसेनापति प्रभुराम शर्माले श्रद्धञ्जली अर्पण गरेका थिए।
गुरूङको शवलाई बुधबार नै नेपाली सेनाको हेलिकप्टरबाट उनको गृह जिल्ला सुर्खेत लगेर परिवारलाई हस्तान्तरण गरिने नेपाली सेनाले जनाएको छ।
