१९ फागुन, काठमाडौं । सन् २०२२ को दोस्रो महिना फेब्रुअरीमा करिब २० हजार पर्यटक नेपाल भ्रमणमा आएका छन् ।
नेपाल पर्यटन बोर्डका निर्देशक मणिराज लामिछानेका अनुसार फेब्रुअरीमा १९ हजार ७६६ जना पर्यटक नेपाल भ्रमणमा आएका छन् । गत वर्षको यही महिनामा ९ हजार १४६ जना पर्यटक नेपाल आएका थिए । सन् २०२२ को पहिलो महिनामा १७ हजार पर्यटक नेपाल भ्रमणमा आएका थिए ।नेपाल पर्यटन बोर्डका अनुसार दुई महिनामा कुल ३७ हजार ७४१ जना पर्यटक नेपाल आएका छन् । कोरोना भाइरस कोभिड को प्रभाव कम हुँदै जाँदा पर्यटकको आगमन धेरै भएको हो ।

तथ्यांक अनुसार नेपाल आउने पर्यटकमा भारतीयको संख्या सबैभन्दा धेरै छ । एक महिनामा भारतबाट ५ हजार ९९८ जना नेपाल आएका छन् । दोस्रो स्थानमा अमेरिका रहेको छ । अमेरिकाबाट ३ हजार ६१४ जना नेपाल आएको देखिएको छ । तेस्रो स्थानमा बेलायत रहेको छ ।