नयाँ वर्षमा घुम्न गएका एक पुरुषको मृत्यु
पुष,१७ काठमाडौं । ओखलढुंगामा लेक लागेर एक पुरुषको मृत्यु भएको छ। जिल्लाको खिजीदेम्बा गाउँपालिका– ३ खिजीचण्डेश्वरीका ५३ वर्षीय जितबहादुर सुनुवारको लेक लागेर हिजो मृत्यु भएको छ।
अंग्रेजी नयाँ वर्ष २०२४ को पहिलो दिन घरबाट साथीहरूसँग घुम्न निस्केका सुनुवारलाई पिके जाने क्रममा सोलुखुम्बु र ओखलढुंगाको सिमानामा पर्ने खिजीदेम्बा भुलभुलेमा लेक लागेको थियो।
लेक लागेर एक्कासि बेहोस भई ढलेका सुनुवारको घटनास्थलमै मृत्यु भएको जिल्ला प्रहरी कार्यालय ओखलढुंगाका सूचना अधिकारी प्रहरी निरीक्षक बालिस्टर सिंहले बताए । सुनुवारसहित खिजीदेम्बाका युवाहरू नयाँ वर्षको अवसर पारेर यस क्षेत्रकै प्रमुख पर्यटकीय क्षेत्र थोलेदेम्बा, भुलभुले हुँदै पिकेडाँडासम्मको यात्रामा थिए।
