अज्ञात समूहले काटिदियो हात्तीको सुँड
चैत्र,२२ काठमाडौं । चितवनको सौराहामा एक हात्तीको सुँड काटिएको छ। पर्यटन व्यवसायी दिपेश खतिवडाले आफूले पालेको पोथी हात्तीको सुँड अज्ञात समूहले काटिदिएको बताए।
अन्दाजी ४५ वर्षकी चञ्चलकली हात्तीको सुँड काटिएको हो। गएराति ११ बजेतिर हात्ती ठूलो स्वरले कराएपछि सुँड काटिएको अवस्थामा फेला परेको व्यवसायी खतिवडाले जानकारी दिए ।
‘राति हात्ती कराएपछि माउतेले थाहा पाएर हात्ती भएको ठाउँमा पुगेछन्। त्यसपछि मलाई फोन गरेपछि १५ मिनेटमै चिकित्सकलाई लिएर त्यहाँ पुगेँ,’ उनले भने।
कसले हात्तीको सुँड काटेको हो भन्ने आफूलाई थाहा नभएको पनि उनले बताए। चञ्चलकली भएको ठाउँमा अन्य दुइटा हात्ती पनि थिए। तर ती हात्तीलाई भने केही नगरेको पाइएको छ।
