पाकिस्तान : पेशावर सहरको मस्जिदमा बम विस्फोट, २८ जनाको ज्यान गयो
पाकिस्तानको पेशावर सहरको एक मस्जिदमा बम विस्फोट हुँदा २८ जनाको ज्यान गएको छ ।
पेशावरको लेडी रिडिङ अस्पतालका प्रवक्ता डाक्टर आजमका अनुसार मस्जिदमा आज सोमवार दिउँसो नमाजको समयमा भएको विस्फोटमा ज्यान गुमाउनेको सङ्ख्या २८ पुगेको हो । ज्यान गुमाउनेमा केही प्रहरीसमेत रहेका छन् । ६० जना घाइते भएकामा १० जनाको अवस्था गम्भीर रहेको पनि प्रहरीलाई उद्धृत गर्दै बीबीसीले जनाएको छ ।
विस्फोटका कारण भवनको एउटा भाग ध्वस्त भएको र मानिसहरू भग्नावशेषमा पुरिएका अधिकारीहरूले बताएका छन्।
पाकिस्तानका विदेश मन्त्री बिलावल भुट्टो जर्दारीले आक्रमणको निन्दा गर्दै आतङ्कवाद र यसका सहयोगीहरूलाई कडाइका साथ कारबाही गरिने बताउनुभएको छ । घटनाको जिम्मा अहिलेसम्म कसैले पनि लिएको छैन ।एजेन्सी
