मतदातालाई पैसा बाँड्न गएका माओवादी नेता पक्राउ
काठमाडौं २८ वैशाख । निर्वाचनको मौन अवधिमा मतदातालाई पैसा बाँडिरहेको अवस्थामा सिरहाबाट माओवादीका एक जना स्थानीय नेता पक्राउ परेका छन्।
आज दिउँसो गोलबजार नगरपालिका–२ स्थित गुरुधाममा मतदाताको घरमा पुगेर पैसा बाँडेको आरोपमा माओवादीका नेता प्रेमकुमार लामालाई नेकपा एमालेका कार्यकर्ताले नियन्त्रणमा लिई प्रहरीलाई बुझाएका हुन्।
प्रहरीका अनुसार लामा स्थानीय भुला महतोको घरमा पैसा दिन पुगेका थिए।
लामाले पैसा बाँड्न गएको एमाले कार्यकर्ताले थाहा पाएपछि उनलाई घेरेका थिए। एमाले कार्यकर्ताले नै इलाका प्रहरी कार्यालय गोलबजारलाई बोलाएर प्रहरीको जिम्मा लगाएको थियो।
