पहिरोले घर पुरिँदा दोलखामा चार जना बेपत्ता
साउन,१९ काठमाडौं । दोलखाको गौरीशंकर गाउँपालिकामा पहिरोले घर पुरिँदा चार जना बेपत्ता भएका छन्। पहिरोमा पुरिएर स्थानीय कृष्णबहादुर मगर, उनकी श्रीमती देव मगर, हरिलाल श्रेष्ठ र ३ वर्षीय बालक प्रिन्स थामी बेपत्ता भएका छन्।
दोलखाको गौरीशंकर गाउँपालिका- ७ मार्बु गाउँमा हिजो साँझ खसेको पहिरोले ५ घर पुरेको छ। पहिरोमा पुरिएकाहरुको सुरक्षाकर्मी र स्थानीयबासीले खोजी गरिरहेको गौरीशंकर गाउँपालिका- ७ वडाध्यक्ष दावा शेर्पाले बताए ।
पहिरोमा पुरिएका तीन जनाको उद्धार गरिएको छ। घाइतेलाई हेलिकोप्टरमार्फत काठमाडौं ल्याउने तयारी भइरहेको छ। पहिरोबाट अन्य १६ वटा घर जोखिममा छन्। सल्लेको पहिरोले केही तल रहेको टोपाटार गाउँमा पनि ३ घर पुरिएको वडाध्यक्ष शेर्पाले बताए।
