फ्रेन्च लिगमा सावित्रा भण्डारी साम्बाको डेब्यु
माघ,२१ काठमाडौं । नेपाली राष्ट्रिय टिमकी सदस्य सावित्रा भण्डारी साम्बाले फ्रेन्च लिगमा डेब्यु गरेकी छन् । साम्बाले फ्रेन्च क्लब एन अभान्ट गुईंगाम्पका लागि हिजो आफ्नो पहिलो खेल खेल्दै डेब्यु गरिन् ।
बोर्डोविरुद्भको उक्त खेल १-१ को बराबरीमा सकिएको थियो । शुक्रबार मात्रै फ्रेन्च क्लबमा अनुबन्ध भएकी साम्बा बोर्डोविरुद्धको खेलमा टिम लाइन अफमा समावेश हुँदै वैकल्पिक खेलाडीको रुपमा थिइन् ।
उनले ७५औं मिनेटमा मैदान प्रवेश गर्दै फ्रान्समा लिग खेल्ने पहिलो नेपाली खेलाडीको कीर्तिमान बनाइन् । खेलमा आठौं मिनेटमा एन्टोइन स्टारोभाले गोल गर्दै गुईंगाम्पलाई अग्रता दिलाएकी थिइन् ।तर, लौरा बौर्गोइनले ३६औं मिनेटमा बोर्डोका लागि बराबरी गोल गरिन् ।
