देवदहमा टिपर दुर्घटना हुँदा दुई जनाको मृत्यु
माघ,५ काठमाडौं । रुपन्देहीको देवदहमा टिपर दुर्घटना हुँदा दुई जनाको मृत्यु भएको छ भने दुई जना घाइते भएका छन् । देवदहको खैरेनीबाट पाल्पाको माथागढीमा बालुवा लिएर जाँदै गरेको लु २ ख ४५०९ नम्बरको टिपर विपरीत दिशाबाट आउँदै गरेको सवारीलाई साइड दिने क्रममा सडकबाट ३०० मिटर तल खसेको प्रहरी चौकी खैरेनीका इन्चार्ज डाक्टर प्रसाद चौधरीले बताए ।
दुर्घटनामा मृत्यु हुनेमा माथागढी गाउँपालिका ६ रहबासका ३५ वर्षीय भिमिसरा सारु र दुई वर्षीय पर्सला सारु रहेका छन् । टिपर चालक र मृतक पर्सलाकी आमा २२ वर्षीय सृजना सारुको देवदह मेडिकल कलेज भलुहीमा उपचार भइरहेको छ । टिपर चालकको नाम खुल्न नसकेको र उनको अवस्था गम्भीर रहेको प्रहरीले बताएको छ । अर्का घाइते सारुको अवस्था मध्यम रहेको इन्चार्ज चौधरीले बताए ।
