भूकम्प प्रभावित क्षेत्रमा आइतबारदेखि राहत र पुनर्स्थापनाको काम हुन्छः प्रधानमन्त्री
कार्तिक,१८ काठमाडौं । प्रधानमन्त्री पुष्पकमल दाहाल प्रचण्डले भोलिदेखि राहत र पुनर्स्थापनाको काम सुरू गरिने बताएका छन्। जाजरकोट र रूकुम पश्चिमको भूकम्प प्रभावित क्षेत्रको अनुगमन गरेर फर्किने क्रममा पत्रकारहरूसँग कुरा गर्दै प्रधानमन्त्री प्रचण्डले आज उद्धार र उपचारमा नै ध्यान केन्द्रित गरिएको बताए।
‘आजको दिनमा जे गर्नुपर्थ्यो राज्य र सरकारबाट त्यही गरिएको छ,’ प्रधानमन्त्री प्रचण्डले भने, ‘भोलिदेखि राहत र पुनर्स्थापनाको काममा लाग्छौं। भोलि राहतका आवश्यक सामग्री लिएर भूकम्प प्रभावित क्षेत्रमा जानेछौं।’
कर्णालीका भूकम्प प्रभावितहरूलाई दिने राहत र गर्ने पुनर्स्थापनाबारे छलफल गर्न प्रधानमन्त्रीले भोलि बिहान ८ बजे मन्त्रिपरिषद् बैठक बोलाएका छन्। त्यसपछि विपत व्यवस्थापन समितिको बैठक बस्ने र आवश्यक निर्णय गर्ने उनले बताए।
