डुबानका कारण विद्यालय तीन दिन बन्द
असार, १४ काठमाडौं । अविरल वर्षापछि डुबानको समस्यामा परेको प्रदेश १ को राजधानी सहर विराटनगरका विद्यालयहरू तीन दिन बन्द हुने भएका छन्।
महानगर क्षेत्रभित्र सञ्चालित विद्यालय तीन दिनका लागि बन्द गर्ने निर्णय महानगरले गरेको हो। महानगर प्रमुख नागेश कोइरालाले दिएको जानकारी अनुसार अविरल वर्षाका कारण बाढी र डुबानको जोखिम बढ्दै गएकाले असार १५ देखि १७ गतेसम्म सामुदायिक र निजी विद्यालय बन्द गर्ने निर्णय गरेको हो।
प्रमुख कोइराला, उपप्रमुख शिल्पा निराला कार्की, प्रमुख प्रशासकीय अधिकृत उमेश बस्नेतसहित १९ वटै वडाका वडाध्यक्षहरूको उपस्थितिमा बसेको बैठकले बर्खे बिदा कटौती गर्ने गरी तीन दिन विद्यालयहरू बन्द गर्ने निर्णय गरिएको महानगरको शैक्षिक प्रशासन महाशाखा प्रमुख दुर्गाप्रसाद खतिवडाले जानकारी दिए।
