कञ्चनपुर – सुदूरपश्चिममा पहिलोपटक बालक्यान्सर तथा रक्तरोग विशेषज्ञ सेवा शुरु भएको छ । कञ्चनपुरको महेन्द्रनगरमा महाकाली प्रादेशिक अस्पतालमा बालक्यान्सर तथा रक्तरोग विशेषज्ञ डा इच्छा ढकालले सेवा प्रदान गर्न थालेसँगै सुदूरपश्चिममै पहिलोपटक बाल क्यान्सर रोग विशेषज्ञ सेवा शुरु भएको हो ।

महाकाली प्रादेशिक अस्पतालका मेडिकल सुपरिटेन्डेन्ट डा अर्जुन भट्टले बालबालिकामा हुने क्यान्सरको पहिचान गर्न र समयमै उपचार गरी निको पार्न सकिने बताउनुभयो । तर क्यान्सरका बिरामी अन्तिम समयमा अस्पतालमा पुग्ने गरेका कारण उपचारका कठिनाइ हुने गरेको उहाँको भनाइ छ ।

प्रादेशिक अस्पतालका अध्यक्ष कृष्णानन्द भट्टले पछिल्लो समय अस्पतालमा विशेषज्ञ सेवा थपिँदै गएको बताउनुभयो । अस्पतालले डायलायसिस सेवासमेत शुरु गरेपछि सेवाग्राहीलाई सहज भएको उहाँको भनाइ छ ।रासस