मंसिर,१५ काठमाडौं । ललितपुर महानगरपालिकाका मेयर चिरीबाबु महर्जनले रातको समयमा जहाजमा चढेर काठमाण्डौ उपत्यका हेर्दा उज्यालो देखिने सहर ललितपुर हुने बताउनुभएको छ ।

हिजो बेलुकी ललितपुर महानगर क्षेत्रभित्र दोस्रो चरणमा जडान गरिएको स्मार्ट सडक बत्ती उद्घाटन कार्यक्रममा मेयर महर्जनले भन्नुभयो, ‘रात्रिकालीन अवस्थामा जहाजमा चढेर काठमाण्डौ उपत्यकामा उज्यालो देख्नुभयो भने त्यो ललितपुर महानगरपालिका हो । जुन सहर उज्यालो हुन्छ, त्यो ललितपुर महानगर हुनेछ ।’

ललितपुरमा हिजो एकै पटक १४ सय वटा स्मार्ट सडक बत्तीको उद्घाटन भएको थियो । दोस्रो चरणअन्तर्गत ललितपुरको भैँसे, खोकना, बुङ्गमती, धापाखेल, सुनाकोठी र हरिसिद्धीमा स्मार्ट बत्ती जडान भएको हो । महानगरले यसअघि पहिलो चरणमा कुपण्डोल, जावलाखेल, लगनखेल, सातदोबाटो, एकान्तकुना, मङ्गलबजार, पाटन ढोका क्षेत्रमा छ सय ६९ वटा स्मार्ट बत्ती जडान गरेको थियो ।