भदौ,२२ काठमाडौं । बर्दियाको राजापुर नगरपालिकाले लगाएको एकीकृत सम्पत्ति एवं अन्य करको बिरोध गर्दै बिभिन्न राजनीतिक दलले तालाबन्दी गर्नुका साथै राजापुर बजारसमेत बन्द गरेका छन् ।

नेपाली कांग्रेस, नेकपा एमाले, राप्रपा, नागरिक उन्मुक्ति, नेकपा एस, राष्ट्रिय जनमोर्चा र क्रान्तिकारी नेकपाले तालाबन्दीसँगै बजार बन्द गरेका हुन् । नागरिकको बेवास्ता गर्दै मनोमानी ढंगले नगरपालिकाले चर्को कर असुलेको दलहरूको आरोप छ ।

भदौ १५ गते वडा कार्यलयहरू घेराउ १८ गते नगरपालिका घेराउलगायतका शान्तिपूर्ण बिरोधका कार्यक्रम गरे पनि नगरपालिकाले सुनुवाइ नगरेपछि थप आन्दोलन घोषणा स्वरुप नगरपालिकामा तालाबन्दी गरिएको नेपाली कांग्रेसका नगर सभापति महेश चौधरीले बताए ।

कर वृद्धि घटाउन आम समुदायको गुनासो आएकाले शान्तिपूर्ण आन्दोलन गरेको नेकपा एमालेका नेता शिवप्रसाद चौधरीले बताए । यता नगरप्रमुख दिपेश थारुले अन्य पालिकाको तुलनामा राजापुर नगरपालिकाले न्यून कर लिएको दाबी गरे ।