माघ १२ काठमाडौ । हुम्लामा बिहानैदेखि हिमपात भएको छ । हरेक वर्ष हिउँदमा हिमपात हुने हुम्लामा यो वर्ष ढिलो गरी हिउँ परेको हो ।

हुम्ला सदरमुकाम सहित जिल्लाभर हिमपात भइरहेको छ । जिल्लाको माथिल्लो क्षेत्र नाम्खा र सिमकोट गाउँपालिकाका धेरै ठाउँहरुमा दुइ फिट भन्दा धेरै हिउँ जमेको छ भने तल्लो क्षेत्रमा भने करिब आधा फिट हिउँ जमेको छ । हिउँपरेपछि विशेष गरी किसानहरु खुुसी भएका छन् । हिउँदे सिजनमा तापक्रम माइनसमा जाने भएकाले हिँउदेवालीका लागि हिउँ उत्तम सिँचाइ मानिन्छ ।

हिमपात भएसँगै हुम्लामा जाडो बढेको छ । जल तथा मौसम विज्ञान विभाग फिल्ड कार्यालय हुम्लाका अनुसार यहाँको तापक्रम माइनस २ डिग्री रहेको छ । बिहानैदेखि आएको निरन्तरको हिमपातले पशुचौपायाहरु गोठभत्रै घाँस हालेर राखिएका छन् भने सोलारबाट सञ्चालित सम्पूर्ण सेवाहरू अवरुद्ध भएका छन् ।