१२ चैत, काठमाडौं । नेपालले दिएको २८९ रनको लक्ष्य पीएनजीले ४८.४ ओभरमा ७ विकेट गुमाएर पूरा गरेको हो । नेपालमा पहिलो पटक भएको द्विपक्षीय एकदिवसीय श्रृंखला पीएनजीले २-० ले जितेको छ ।

पीएनजीको जितमा लेगा सिएकाले ९० रन बनाए । यस्तै लोअर अर्डमा रिले हेकुरेले अविजित ४८ रन जोडे ।
पीएनजीसँग नेपालको यो लगातार दोस्रो हार हो । शुक्रबार भएको पहिलो खेलमा रोहित पौडेलले १२६ रन बनाएपनि नेपाल पीएनजीसँग ६ रनले पराजित भएको थियो ।

लक्ष्य पछ्याउने क्रममा पीएनजीको सुरुवात राम्रो हुन सकेन । कप्तान सन्दीप लामिछानेले पहिलो ओभर बलिङ गर्दा पीएनजीले ९ रन जोडेको थियो । तर सोमपाल कामीले दोस्रो ओभरमा लगातार दुई विकेट लिए । सोमपालले ९ रन बनाएका ओपनर टोनी उरालाई दोस्रो बलमा कुशल भुर्तेलबाट क्याचआउट गराए भने तेस्रो बलमा कप्तान असद भालालाई आरिफ शेखबाट क्याचआउट गराए ।