ललितपुरमा कार दुर्घटना हुँदा तीन जना घाइते
बैशाख, २२ काठमाण्डौ । ललितपुरको हात्तीवनमा कार अनियन्त्रित भएर दुर्घटना हुँदा ३ जना घाइते भएका छन् । हिजोराती बा १५ च ७६५२ नम्बरको कार दुर्घटना हुँदा कारमा रहेका विशाल बिक, अमरध्वज पौडेल र मुसेस लामिछाने घाइते भएका प्रहरीले बताएको छ । घाइते सबैको पाटन अस्पतालमा उपचार भइरहेको ललितपुर प्रहरी परिसरका एसपी चक्रराज जोशीले बताउनुभयो ।
उहाँका अनुसार कारमा चालकसहित ४ जना थिए । कार चालक रुपक सापकोटा भने सामान्य घाइते भएका छन् । उनले रक्सी खाएर गाडी चलाएको पाइएकोले प्रहरीले पक्राउ गरेर अनुसन्धान गरिरहेको छ । कारको ठक्करबाट सडकमा रहेको बिजुलीको पोल भाँचिएको छ ।
