सिन्धुलीमा सुतेकै ठाउँमा सर्पले टोकेर दाजुभाइको मृत्यु
जेठ,१६ काठमाडौं । सिन्धुलीमा सर्पको डसाईबाट २ जना बालकको मृत्यु भएको छ। दुधौली नगरपालिका वडा नम्बर १ कुर्थौलीमा सर्पको डसाईबाट २ जनाको मृत्यु भएको जिल्ला प्रहरी कार्यालय सिन्धुलीले बताएको छ ।
मृतक सोही ठाउँका १३ वर्षीय ग्रीस पहाडी र उनका ३ वर्षीय भाइ ग्रीष्म पहाडी छन्। हिजो राति उनीहरू आफ्नी २९ वर्षीया आमा गंगा पहाडीसँग एक तले पक्की घरमा सुतिरहेका थिए। आज बिहान करिब ३ बजे दुबै बालक छटपटाइरहेका थिए।
ग्रीसको बाँया हातको औंलामा र ग्रीष्मको बाँया खुट्टामा निलडाम देखिएको थियो। उनीहरूलाई प्राथमिक स्वास्थ्य केन्द्र सिर्थौलीमा लगिएको थियो। त्यहाँ उपचार हुन नसकेपछि जानकी हेल्थ केयर जनकपुरमा लगिएको थियो। उपचारको क्रममा चिकित्सकले आज बिहान ८ बजे दुवै बालकलाई मृत घोषणा गरेको जिल्ला प्रहरी कार्यालय सिन्धुलीले बताएको छ ।
