नेदरल्यान्ड्सका एक ४१ वर्षीय पुरुषले ५५० जना बच्चा जन्माउन वीर्यदान गरेपछि अदालतले अबदेखि भने वीर्यदान नगर्न चेतावनी दिएको छ ।

बीबीसीका अनुसार जोनाथन नाम गरेका ४१ वर्षीय पुरुषले अबदेखि वीर्यदान गरेको पाइएमा उनलाई १ लाख युरोभन्दा धेरै रकम जरिवाना हुने द हेगस्थित अदालतले बताएको हो ।

सन् २०१७ मै उनले १०० भन्दा धेरै बच्चा जन्माउनका लागि भूमिका निर्वाह गरेका थिए जसकारण नेदरल्याण्ड्सका प्रजनन क्लिनिकहरूमा उनलाई वीर्यदान गर्न प्रतिबन्ध लगाइयो ।

तर उनले विवरण लुकाउँदै विदेशमा र अनलाइनमार्फत वीर्य दानको काम जारी राखेको पाइएको छ । यतिबेला अदालतले उनलाई वीर्य प्रदान गरेका क्लिनकहरूको सूची उपलब्ध गराउन र तिनलाई उनको वीर्य नष्ट गर्न भनेको छ ।

नेदरल्याण्ड्सको कानुन अनुसार एकजना वीर्यदाताले १२ परिवारमा २५ जना भन्दा धेरै बच्चाका लागि बाबु बन्न मिल्दैन ।

तर ती पुरुषले भने सन् २००७ मा वीर्यदान गर्न सुरु गरेयता ५५० देखि ६०० बच्चा जन्माउन सघाएका छन् । उनले महिलाहरुलाई आफूले कहिल्यै वीर्यदान नगरेको बताउने गरेको पाइएको छ ।

यसरी संसारभर धेरैभन्दा धेरै बच्चा जन्माउन वीर्यदान गर्दा प्राकृतिक दाजुभाइ–दिदीबहिनीबीच अनजानमै विवाह भएर सन्तान जन्मिन सक्ने सम्भावना हुन्छ । बीबीसी