सुरक्षा भत्ता बुझ्न जाने सेवाग्राहीलाई गाडीको सुविधा
भदौ, ७ काठमाडौं । जुम्ला – जुम्लाको हिमा गाउँपालिका १ ले सामाजिक सुरक्षा भत्ता बुझ्न जाने सेवाग्राहीलाई गाडीको सुविधा दिन थालेको छ । वडा नम्बर १ का धेरैलाई बैंकमा आउन झन्डै एक दिन लाग्ने र हिँडेर कठिन हुने भएकाले वडा कार्यालयले सबैलाई बैंकमा जान गाडीको सुविधासहित सामाजिक सुरक्षा भत्ता बुझ्न र घर आउन सहज हुने भएको छ ।
वडाध्यक्ष रतनबहादुर शाहीका अनुसार चार सय ५७ जनालाई सामाजिक सुरक्षा भत्ताका लागि गाडीको व्यवस्थापन गरी सेवा दिइएको छ । वडा अध्यक्ष शाहीका अनुसार बालबालिका दुई सय ६१ जना, ज्येष्ठ नागरिक एक सय ७३ जना, एकल महिला १८ जना र अपाङ्गता भएका व्यक्ति चार जनालाई गाडी रिजर्भ गरेर सेवा दिइएको छ ।
