Yeti Khabar

२०८० चैत्र १६, शुक्रबार - Fri Mar, 2024 -

म्याग्दीमा पहिरोले लियो एकै परिवारका ५ जनाको ज्यान

१७ साउन, पोखरा । म्याग्दीको मालिका गाउँपालिका-२, रुमका घामबहादुर विक लामो समय वैदेशिक रोजगारमा बिताए । अब नेपालमै केही गर्ने भनेर गत वर्षमात्रै फर्किएका उनले पाँच वटा खच्चड किनेर ढुवानी व्यवसाय सुरु गरेका थिए ।

विकट ठाउँमा बसाईं भएकाले खच्चड व्यवसायले राम्रो आम्दानी पनि दिइरहेको थियो । परिवार खुसी नै थियो । तर, मंगलबार बिहान गएको पहिरोले घामबहादुरको जीवनको सदाका लागि अस्तायो ।

बिहान करिब ४ बजे आसपास गएको पहिरोले घामबहादुरको घर पुर्दा परिवारका सबै ५ जनाको मृत्यु भयो । तर, निरन्तर झरी परिरहेको र विकट भएकाले नजिकै भएका गाउँलेले पनि ढिलो गरीमात्रै घटनाबारे थाहा पाए । पहिरोमा परी घामबहादुर, उनकी पत्नी ३४ वर्षीया राममाया विक, १५ वर्षीय छोरा नवीन विक, १३ वर्षीय छोरा राजन र ७ वर्षीय छोरी अस्मिको मृत्यु भएको वडाध्यक्ष उदयकुमार बुढाथोकीले जानकारी दिए ।

पहिरोले पुरेको अवस्थामा सुरुमा ३ जनाको मात्रै शव फेला परेको थियो । स्थानीय स्वास्थ्यचौकीकी अनमी धनमाया पुनका अनुसार सुरुमा नवीन विक र राजन विकको शव फेला परेको थियो बाँकी ३ जनाको अवस्था अज्ञात थियो । तर मंगलबार दिउँसोसम्म सबैको शव भेटिएको छ ।

पहिरोले घामबहादुरको गोठ पनि बगाएको छ र त्यहाँ रहेको एउटा खच्चडको पनि मृत्यु भएको छ । बाँकी ४ वटा खच्चड पनि घाइते रहेको अनमी पुनले जानकारी दिइन् । पहिरोले रुमका २ घर पुरेको छ भने ४ घर उच्च जोखिममा छन् । ‘तलका ४ घर पनि उच्च जोखिममा रहेकाले अन्तै सारिसकिएको छ’, उनले भनिन् ।

पहिरोमा परी स्थानीय ६५ वर्षीय गोठे विक र उनकी श्रीमती गोरी घाइते भएका छन् । उनीहरुको स्थानीय स्वास्थ्य चौकीमा उपचार भइरहेको छ । ‘उहाँहरुको थप उपचार गर्नुपर्नेछ । तर, बाटो नै खुलेको छैन, यहीं हुनुहुन्छ,’ उनले भनिन्, ‘अरु अवस्था भने सामान्य छ ।’

घाइते गोठे विकले आफूहरु सुतिरहेकैबेला एक्कासी घरमाथि पहिरो खसेको बताए । उनका अनुसार पहिरोमा परी मृत्यु भएका घामबहादुरको घर नजिकै उनको घर थियो । ‘छोराछोरी माथिको घरमा सुतेका थिए । हामी तलै थियौं,’ उनले भने, ‘अहिले ढाड चलेकै छैन । एक्सरे गरेर हेर्नुपर्छ रे १ तल (दरबाङ) फोन गर्दा पनि बाटो खुलेको छैन भन्ने खबर आयो ।’

मालिका गाउँपालिकाकै वडा नम्बर ३ मा मंगलबार दिउँसो गएको पहिरोले एक घर बगाएको छ । प्रमुख जिल्ला अधिकारी चिरञ्जीवि रानाका अनुसार पहिरोले घर बगाए पनि मानवीय क्षति भने भएको छैन । ‘करिब ३ सय मिटर तल बगाएको छ । तर, दिउँसो भएकाले मानवीय क्षति भने छैन’, उनले भने ।

आइतबारदेखि निरन्तर परिरहेको वर्षातले पहिरो खस्दा म्याग्दी मुस्ताङ बाटोसमेत बन्द भएको छ । प्रजिअ रानाका अनुसार सडकको पहिरो पन्छाउन समय लाग्ने देखिएको छ ।अनलाइन खबर

Facebook Comment
Company Information

यती मिडिया प्रा.लि.(Yati Media Pvt. Ltd.)
अध्यक्ष: मोतिसरा खड्का
सम्पादक: डम्बर विक्रम कार्की
सह सम्पादक: खड्ग बहादुर रम्तेल
कानुनी सल्लाहकार: राम नारायण विडारी (वरिष्ठ अधिवक्ता)
सुचना तथा प्रसारण विभाग दर्ता नं
3193-2078/2079
कम्पनी दर्ता नं: 283675/078/079
प्यान नं: 610213157

Contact Information

Yati Media Pvt. Ltd.
Putali Galli, Kalanki, Kathmandu

01 5315254, 9851100556
info@yetikhabar.com
www.yetikhabar.com