लागूऔषधसहित २ जना पक्राउ
असार, ३ काठमाडौं । प्रहरीले २ जना भारतीयलाई लागूऔषध खैरो हेरोइन (ब्राउन सुगर) सहित विराटनगरबाट हिजो साँझ पक्राउ गरेको छ।
पक्राउ पर्नेमा १ जना १४ वर्षीय बालक छन् भने अर्का भारतको अररिया सोनामनीका १८ वर्षीय विकास ठाकुर हुन्। बालकको पहिचान प्रहरीले गोप्य राखेको छ।
उनीहरु भारतीय मोटरसाइकलमा सवार थिए। मोरङ प्रहरीका प्रवक्ता डिएसपी दीपक श्रेष्ठका अनुसार भारतबाट नेपालतिर छिरेपछि विराटनगर महानगरपालिका–१७ मटेरुवाबाट साँझ साढे ५ बजेतिर पक्राउ गरिएको हो।
पक्राउ परेकाहरुको साथबाट ३ दशमलब ६ ग्राम ब्राउन सुगर बरामद भएको छ। दुुवै जनाविरुद्ध लागूऔषध ऐनअन्तर्गतको मुद्दा चलाउन आज अदालतबाट म्याद थप गरेर अनुसन्धान अघि बढाएको छ।
